قصيدة زجليه ساخرة بقلم الحالم بالغد
مسجلة ضمن حقوق الملكية الفكرية
يادى النيلة ويادى الحُوسَة ... المدمس بقى بسبوسة
بالعجمية وجوز الهند ... وزبيبها يجى ألفين سوسة
******
وابن الإيه زى الحرامية ... لُه سِتّاشَر شكل ومِيّه
تطحن منه وترمى ف زيتك ... تطلع منه بالطعمية
تاكل منها الصبح فطارك ... تلقى عيونك متغمية
******
ياسلام لو تاكله بالبيض ... أو بالسمنة أو بالزيت
تبدأ يومك بخناقة هادية ... وتختمها بخراب البيت
واللى يعارض أو يحتج ... يخبط راسه ف اجدع حيط
******
يا سلام لو تعصرله لمونه ... ومفيش مانع م الكمونة
والبهارات والفلفل واقلب ... ينزل بطنك زى المونة
تعمى ف عينك تحب حماتك ... وترمى عيالك م البلكونة
******
وإذا كانوا بيقولوا عليه ... فطار الباشا وابن البيه
والفقير يتغدى منه ... والحمير تتعشى بيه
طب اللى بياكل منه 3 طـ ... ـقات ف اليوم يبقى اسمه ايه؟
******
تمت
ليست هناك تعليقات:
إرسال تعليق